नवलपुरमा अज्ञात वस्तु काट्ने क्रममा विस्फोट, दुई जना घाइते

नवलपुर, असोज २६ — नवलपरासी (बर्दघाट सुस्ता पूर्व) को कावासोती नगरपालिका–८, थकाली चोकमा अज्ञात वस्तु काट्ने क्रममा अचानक विस्फोट हुँदा दुई जना घाइते भएका छन्।

प्रहरीका अनुसार कावासोती–१७ स्थित अमलटारीघाटमा नारायणी नदी किनारमा फेला परेको बेलनाकार वस्तु घरमा ल्याएर हेक्सा ब्लेडले काट्ने क्रममा सोमबार बिहान करिब ११:२० बजे विस्फोट भएको हो।

विस्फोटमा मध्यविन्दु नगरपालिका–३ का ४९ वर्षीय एकासी बोटे र कावासोती–८ मा बस्दै आएका २८ वर्षीय सचिन कुमार घाइते भएका छन्। दुवैलाई उपचारका लागि मध्यबिन्दु प्रादेशिक अस्पताल, डण्डा लगिएको र अवस्था मध्यम रहेको जनाइएको छ।

विस्फोट भएको वस्तु के थियो भन्ने खुलेको छैन। घटनाबारे प्रहरीले थप अनुसन्धान गरिरहेको छ।

Source : Nepal Police 

PMS News Nepal
सत्य र विकासको सम्बाहक