कुश्मा-बेनी खण्डमा पहिरोले सडक भत्काउनुका साथै ठूलो जोखिम बढाएको छ।

२० असोज काठमाडौँ ,असोज ८ पछिको अविरल वर्षा र बाढीले कुश्मा-बेनी क्षेत्रमा ठूलो क्षति पुर्‍याएको छ। ठाउँ-ठाउँमा पहिरो खसेर सडक क्षतिग्रस्त बनेको छ भने भीरका ढुंगा खस्ने डरले यात्रा जोखिमपूर्ण छ। असोज ११ को कालीगण्डकी बाढीले बागलुङ र पर्वत जोड्ने ऐतिहासिक मालढुंगा आर्क ब्रिजको पहुँचमार्ग कटान गर्दा मध्यपहाडी राजमार्ग हुँदै सुदूरपश्चिमसम्मको यातायात सम्पर्क विच्छेद भएको छ।

स्थानीयका अनुसार अवैधानिक नदी दोहन र क्रसर उद्योगका कारण बाढीले धार परिवर्तन गरी क्षति पुर्‍याएको हो। सडक डिभिजन पोखराले आकस्मिक रूपमा दशैँअगावै पहुँचमार्ग खुलाउने प्रयास गरिरहेको छ। हाल मालसामान आपूर्ति ठप्प हुँदा उपभोग्य वस्तुको अभाव देखिएको छ भने यात्रुहरू झोलुंगे पुलबाट पैदल नदी तरेर गन्तव्यतर्फ लागिरहेका छन्।