बाढी पहिरोले क्षति पुगेको म्याग्दी-मुस्ताङ जोड्ने बेनी–जोमसोम सडक मर्मत सुरु

पछिल्लो झरीपछिको बाढीपहिरोले क्षति पुर्‍याएको बेनी–जोमसोम सडकको ४६ ठाउँमा मर्मत थालिएको छ। जोमसोम र बेनी दुवैतर्फबाट उपकरण परिचालन गरी मालढुङ्गा–गलेश्वर र जोमसोम–नागढुङ्गा खण्ड खुलाएर यातायात चालु गरिएको बेनी–जोमसोम–कोरला सडक आयोजनाले जनाएको छ।

सडक अवरुद्ध हुँदा चीनसँगको कोरला नाका र म्याग्दी–मुस्ताङका विभिन्न पालिकामा यातायात सम्पर्क टुटेको छ। जसले गर्दा सयौँ कन्टेनर रोकिएका छन् भने दसैँका लागि स्याउ, आलु र भेडाच्याङ्ग्रा बजार लैजान तथा पर्यटकीय गतिविधिमा बाधा पुगेको छ। गम्भीर बिरामी र राहतका लागि हेलिकप्टर प्रयोग गर्नुपरेको छ। तिल्केनीचौरमा कटानका कारण विद्युत् टावर हटाएर सडक खुलाउने प्रयास जारी छ।