त्रिशूली नदीको कटानले भासिएको पृथ्वी राजमार्ग दुईतर्फी सञ्चालनमा

धादिङ, असोज २५ — धादिङको गजुरी गाउँपालिका–५, गलौदीस्थित पृथ्वी राजमार्गमा त्रिशूली नदीको कटानका कारण भासिएर अवरुद्ध भएको सडक पुनः दुईतर्फी सञ्चालनमा आएको छ। आज दिउँसो ३:१० बजेदेखि सडकमा दुवैतर्फ सवारीसाधन सञ्चालन हुन थालेका हुन्।

यसअघि असोज २३ गते साँझ त्रिशूली नदीले सडकको तल्लो भाग कटान गरेपछि राजमार्गको काठमाडौं जानेतर्फको सडकखण्ड भासिएको थियो। सडकमा चिरा देखिनुका साथै थप क्षति र पहिरोको जोखिम बढेपछि प्रहरीले सवारी आवागमन रोकेको थियो।

सडक विभागले पहाडतर्फको भाग काटेर सडक फराकिलो बनाउने तथा वैकल्पिक ट्र्याक निर्माण गर्ने काम अघि बढाएको थियो। मर्मत कार्यपछि सडकमा सवारी आवागमन क्रमशः सञ्चालनमा ल्याइएको हो। 

पृथ्वी राजमार्ग काठमाडौंलाई धादिङ, चितवन, पोखरा तथा देशका विभिन्न भागसँग जोड्ने प्रमुख सडक मार्ग हो। यस खण्डमा सडक अवरुद्ध हुँदा लामो दूरीका यात्रु तथा मालवाहक सवारीसाधन प्रभावित हुने गरेका छन्।

सडक सञ्चालनमा आए पनि नदी कटान तथा सडक भासिने जोखिमलाई ध्यानमा राख्दै यात्रु र सवारीचालकलाई सावधानी अपनाउन आग्रह गरिन्छ।

PMS News Nepal