जिवनशैली

रगत अभावमा जटिल बनेकी सुत्केरीलाई प्रहरी अधिकृतले बचाए।

२० असोज, काठमाडौं । बाजुरा अस्पतालमा शल्यक्रियामार्फत शिशु जन्माएकी गंगा दमाइलाई अत्यधिक रक्तस्राव भएपछि आवश्यक ‘बी पोजेटिभ’ रगत जिल्ला प्रहरी कार्यालयका प्रमुख डीएसपी शैलेश्वरी बोहरा र प्रहरी निरीक्षक गगनसिंह भाटले दिएर ज्यान बचाए।

सपना न्यौपाने

काठमाडौँ | २० आश्विन २०८३, मंगलवार

जिल्ला अस्पताल बाजुरामा शल्यक्रियामार्फत शिशु जन्माएकी बडिमालिका–७ की गंगा दमाइलाई अत्यधिक रक्तस्राव भएपछि तत्काल ‘बी पोजेटिभ’ रगत आवश्यक पर्यो। अस्पतालमा रगत अभाव भएपछि जिल्ला प्रहरी कार्यालय बाजुराका प्रमुख डीएसपी शैलेश्वरी बोहरा र प्रहरी निरीक्षक गगनसिंह भाटले राति नै अस्पताल पुगेर रगत दिई उनको ज्यान बचाए।

बाजुरामा रक्तसञ्चार केन्द्र (ब्लड बैंक) र जनचेतनाको कमीका कारण रगत संकलन तथा व्यवस्थापनमा निकै समस्या छ। सातामा १० जनाभन्दा बढी बिरामीलाई रगत चाहिने भए पनि ९० प्रतिशतभन्दा बढी रगत सेना, प्रहरी र स्वास्थ्यकर्मीले दिने गरेका छन्। ब्लड बैंक स्थापनाका लागि बजेट अभाव र रेडक्रसले ल्याएको डी-फ्रिज सञ्चालन नहुँदा स्थानीयले रगतका लागि भौँतारिनुपर्ने बाध्यता छ।