नेपाली कांग्रेस महाधिवेशन: ढिलाइ हुने भएपछि विद्युतीय मतदान रद्द, कागजी प्रयोग गरिने

नेपाली कांग्रेसको १५औं महाधिवेशन खुलामञ्चमा सुरु हुँदैछ भने भोलि नयाँ नेतृत्व चयनका लागि उम्मेदवारी दर्ता हुनेछ। यसपटकको निर्वाचनमा विद्युतीय भोटिङ मेसिन प्रयोग नगर्ने निर्णय गरिएको छ। सात हजारभन्दा बढी प्रतिनिधि रहेकाले विद्युतीय मेसिनबाट पनि नतिजा आउन एक-दुई दिनभन्दा बढी समय लाग्ने प्राविधिक कम्पनी (राम-लक्ष्मण) ले बताएपछि कांग्रेसले पुरानै कागजी विधिबाटै मतदान गराउने निष्कर्ष निकालेको हो। महाधिवेशन प्रतिनिधिहरूका लागि मतदान प्रक्रिया सहज बनाउन खुलामञ्च, राष्ट्रिय सभा गृह र कमलादीस्थित प्रज्ञा प्रतिष्ठान गरी तीन फरक स्थानमा आवश्यक प्रबन्ध र तयारी भइरहेको छ।