अविरल वर्षाका कारण सम्भावित जोखिमलाई मध्यनजर गर्दै विराटनगरका विद्यालय दुई दिन बन्द

८ असोज, विराटनगर । अविरल वर्षाबाट हुन सक्ने सम्भावित जोखिमलाई मध्यनजर गर्दै विराटनगर महानगरपालिकाले दुई दिन विद्यालय बन्द गर्ने निर्णय गरेको छ । महानगरपालिकाको शैक्षिक प्रशासन महाशाखाका अनुसार आज र भोलि महानगर क्षेत्रका विद्यालयमा बिदा दिइएको हो । जल तथा मौसम विज्ञान विभागले असोज ८ देखि ११ गतेसम्म देशका विभिन्न स्थानमा भारीदेखि अति भारी वर्षा हुनसक्ने पूर्वानुमान गरेको छ । वर्षाका कारण नदी तथा खोलामा पानीको बहाव बढ्ने, बस्ती र सडकमा डुबान हुने तथा यातायात प्रभावित हुने सम्भावना रहेकाले विद्यार्थीको सुरक्षालाई प्राथमिकता दिई विद्यालय बन्द गरिएको महाशाखाले जनाएको छ । विपद्को अवस्था सिर्जना भए सुरक्षित विद्यालय भवनलाई आवश्यकताअनुसार अस्थायी आश्रयस्थलका रूपमा प्रयोग गर्न सक्ने गरी तयारी अवस्थामा राख्न महानगरले विद्यालय प्रशासनलाई आग्रह गरेको छ ।