एसियन गेम्स टेबलटेनिस मिक्स्ड डबल्समा रुविन र इभाना दोस्रो चरणमा प्रवेश

६ असोज, काठमाडौं । २०औं एसियन गेम्सअन्तर्गत टेबलटेनिस मिक्स्ड डबल्समा नेपालका रुविन महर्जन र इभाना थापा दोस्रो चरणमा प्रवेश गरेका छन् । जापानको स्काई हल टोयोटामा मंगलबार भएको पहिलो चरणमा उनीहरूले पाकिस्तानका मोहम्मद खान र कलसुम खानको जोडीलाई ३–० को सोझो सेटमा पराजित गरे । नेपालले पहिलो सेट ११–६, दोस्रो ११–८ र तेस्रो ११–४ ले जितेको हो । दोस्रो चरणमा रुविन–इभाना जोडीले हङकङका क्वान तो याउ र विङ लाम ङसँग प्रतिस्पर्धा गर्नेछ । यता, नविता श्रेष्ठ र सन्योग कपालीको जोडी भने मंगोलियाका बिल्गुन अन्खबयार र अन्खमा सेर–ओदसँग ३–१ ले पराजित भयो । पहिलो सेट ११–२ ले जिते पनि त्यसपछि लगातार तीन सेट गुमाउँदै नविता–सन्योग पहिलो चरणबाटै बाहिरिए ।