धनकुटाको बन्चरेमा जिप दुर्घटना हुँदा ज्यान गुमाउनेको पहिचान खुलेको छ।

धनकुटाको छथरजोरपाटी गाउँपालिका–३ बन्चरेमा काजीमानेबाट धनकुटातर्फ आउँदै गरेको को. १ ज. २४९४ नम्बरको जिप ब्रेक फेल भई सडकबाट करिब ५० मिटर तल खस्दा छथरजोरपाटी–३ की ६० वर्षीया शोकमाया लिम्बूको घटनास्थलमै मृत्यु भएको छ। दुर्घटनामा चालक खगेन्द्र खत्रीसहित १० जना घाइते भएका छन्, जसमा धनकुटाका विभिन्न वडाका आशिष लिम्बू, धनमाया राई, न्युहाङ सुब्बा, पुनम लिम्बु, आरध्या लिम्बु, आइन्द्र लिम्बु, भवानी लिम्बु, हेमबहादुर लिम्बु र अबिन लिम्बु रहेका छन्। जिल्ला अस्पताल धनकुटामा उपचार सम्भव नभएपछि सबै घाइतेहरूलाई थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको छ। प्रहरी नायब उपरिक्षक हेमन्त भण्डारी क्षेत्रीका अनुसार दुर्घटनाग्रस्त गाडी निकाल्ने प्रयास भइरहेको छ भने घटनाको थप अनुसन्धान जारी छ।