भोटेकोशी बाढीमा बेपत्ता श्रमिकको खोजी–उद्धार अधिकांश जलविद्युत् आयोजनामा रोकियो

३१ भदौ, काठमाडौं । १० भदौमा आएको रसुवा भोटेकोशी बाढीले रसुवा र नुवाकोटका जलविद्युत् आयोजनामा ठूलो क्षति पुर्‍याएपछि बेपत्ता श्रमिक तथा कर्मचारीको खोज तथा उद्धार अधिकांश आयोजनामा रोकिएको छ । बाढीबाट प्रभावित १३ आयोजनामध्ये चिलिमे, माथिल्लो त्रिशूली–१ र माथिल्लो त्रिशूली–३ ‘बी’ मा मात्रै खोजी जारी छ । रसुवागढी, रसुवा भोटेकोशी, मैलुङ खोला, माथिल्लो त्रिशूली–३ ‘ए’, देवीघाट र माथिल्लो मैलुङसहित अन्य आयोजनामा खोजी रोकिएको हो । इप्पानका अनुसार ११ आयोजनामा कार्यरत ८६८ जना अझै सम्पर्कविहीन छन् । चिलिमेमा सुरुङभित्र थुप्रिएको माटो र बोल्डर हटाउने काम जारी छ । त्यहाँ ६ जना फसेको अनुमान गरिएको छ । माथिल्लो त्रिशूली–३ ‘बी’ मा भवनका संरचना नै बाढीले बगाएको अवस्थामा खोजी भइरहेको छ ।