जापानमा २५ वर्षीया नेपाली युवती नदीमा मृत फेला

जापानको फुकुओका सहरस्थित नाकागावा नदीमा अगस्ट १९ (भदौ ३) मा नेपाली विद्यार्थी लक्ष्मी राजवंशीको शव भेटिएको छ। झापाको भद्रपुर–७, अन्जनी मोडकी लक्ष्मी नदीमा घोप्टो परेको अवस्थामा भेटिएकी थिइन्। उनको अनुहार र टाउकोमा चोट देखिएको थियो भने उनी टी–सर्ट र छोटो पाइन्टमा थिइन्। खुट्टामा जुत्ता थिएन। फुकुओका प्रहरीका अनुसार उनी चुओ वार्डमा बस्दै व्यावसायिक विद्यालयमा अध्ययनरत थिइन्। प्रहरीले घटनालाई दुर्घटना नभई हत्या भएको निष्कर्षसहित अनुसन्धान अघि बढाइरहेको जनाएको छ। झापा–३ का प्रतिनिधिसभा सदस्य प्रकाश पाठकले घटनाप्रति दुःख व्यक्त गर्दै परराष्ट्र मन्त्रालय, नेपाली दूतावास र सम्बन्धित निकायमार्फत छानबिन, दोषीमाथि कारबाही तथा शव नेपाल ल्याउने प्रक्रिया सहजीकरण भइरहेको बताएका छन्। उनका अनुसार जापानी प्रहरीले घटनाबारे सूक्ष्म अनुसन्धान गर्दै पाँच जनालाई नियन्त्रणमा लिएको छ।