२३ महिने बालिका १२ घण्टापछि सकुशल फेला

बाराको कलैयाबाट शनिबार साँझ हराएकी २३ महिने बिन्दीकुमारी मण्डल १२ घण्टापछि आइतबार बिहान सकुशल फेला परेकी छन्। कट्टिपर्सास्थित घरछेउबाट साँझ ५ः३० बजे बेपत्ता भएपछि परिवारले राति प्रहरीलाई खबर गरेका थिए। सूचना पाएलगत्तै नेपाल प्रहरी, नेपाली सेना र सशस्त्र प्रहरीको टोली खोजीमा परिचालन गरिएको थियो। तालिमप्राप्त कुकुरसहितको टोलीले समेत सम्भावित स्थानमा खोजी गरेको थियो। क्रममा बिहान ५ः४५ बजे कलैया–२६, सिसवा महेशपुरमा सडक किनारको नालामा बालिका रोइरहेको अवस्थामा स्थानीय सल्मा नेसाले फेला पारेकी थिइन्। उनले बालिकालाई उद्धार गरी आफन्तलाई खबर गरेपछि प्रहरी पुगेको थियो। घरबाट करिब एक किलोमिटर उत्तरतर्फ भेटिएकी बालिकाको स्वास्थ्य परीक्षण गर्दा अवस्था सामान्य रहेको प्रहरीले जनाएको छ। उनी कसरी त्यहाँ पुगिन् भन्नेबारे प्रहरीले तत्काल अनुसन्धान गरिरहेको छ।