बुद्धभुमिमा बजार अनुगमनमा कडाइ : दर्ता नभएका पसललाई १५ दिने अल्टिमेटम

बुद्धभूमि नगरपालिका द्वारा प्रशासकीय अधिकृत विजय भुसाल को संयोजकत्वमा बुद्धभूमि नगरपालिका वडा नम्बर ९ का बजारहरुमा बजार अनुगमन गरिएको छ। उपभोक्ताको स्वास्थ्य सुरक्षा तथा व्यवसायलाई व्यवस्थित बनाउने उद्देश्यले सञ्चालन गरिएको अनुगमनमा ३३ वटा विभिन्न पसलहरूको निरीक्षण गरिएको थियो।

अनुगमनका क्रममा अधिकांश पसलहरू दर्ता तथा नवीकरण नगरी सञ्चालन भइरहेको पाइएको नगरपालिकाले जनाएको छ। त्यसपछि दर्ता तथा नवीकरण नभएका व्यवसायीहरूलाई १५ दिनभित्र कानुनी प्रक्रिया पूरा गर्न आग्रह गर्दै लिखित पत्राचार समेत गरिएको छ।

त्यसैगरी निरीक्षणका क्रममा केही पसलहरूमा म्याद गुज्रेका खाद्य तथा उपभोग्य सामग्री फेला परेपछि ती सामग्री सम्बन्धित पसल अगाडि नै नष्ट गरिएको थियो। उपभोक्ताको स्वास्थ्यमा प्रत्यक्ष असर पर्ने खालका वस्तु बिक्री वितरण नगर्न नगरपालिकाले व्यवसायीहरूलाई सचेत गराएको छ।

अनुगमन टोलीमा जनप्रतिनिधि, उद्योग वाणिज्य संघ का प्रतिनिधि, नेपाल प्रहरी तथा पत्रकारहरूको समेत उपस्थिति रहेको थियो। टोलीले व्यवसायीहरूलाई कानुनअनुसार पसल दर्ता तथा नवीकरण गर्न, म्याद गुज्रेका वस्तु बिक्री नगर्न तथा उपभोक्ता हितलाई ध्यानमा राखेर व्यवसाय सञ्चालन गर्न आग्रह गरेको जनाएको छ।

नगरपालिकाले बजारलाई व्यवस्थित, सुरक्षित र उपभोक्तामैत्री बनाउन आगामी दिनमा समेत नियमित अनुगमनलाई निरन्तरता दिइने सहायक प्रशासकीय अधिकृत केशव बेल्बासेले बताउनुभयो ।