बुद्धभूमिमा एमालेलाई धक्का: नगर सचिव नारायण पन्थी रास्वपा प्रवेश

कपिलवस्तुको बुद्धभूमि नगरपालिकामा नेकपा (एमाले) का प्रभावशाली नेता एवं नगर सचिव नारायण प्रसाद पन्थी राष्ट्रिय स्वतन्त्र पार्टी (रास्वपा) मा प्रवेश गर्नुभएको छ।

शनिबार बुद्धभूमि नगरपालिका वडा नं. ८ को वडा अधिवेशनका अवसरमा आयोजित एक कार्यक्रमका बीच पन्थी औपचारिक रूपमा रास्वपामा समाहित हुनुभएको हो। लामो समयदेखि एमालेको नगर सङ्गठनमा मुख्य जिम्मेवारी सम्हाल्दै आउनुभएका पन्थीको बहिर्गमनलाई स्थानीय राजनीतिमा एमालेका लागि ठूलो क्षतिका रूपमा हेरिएको छ।

रास्वपा बुद्धभूमि नगर सभापति कमल भट्टराईले पन्थीलाई पार्टीमा स्वागत गर्दै उहाँको अनुभव र सक्रियताले नगरमा रास्वपाको सङ्गठन विस्तारमा ठूलो सहयोग पुग्ने विश्वास व्यक्त गर्नुभयो। "नारायण प्रसाद पन्थीजस्तो स्थापित र अनुभवी व्यक्तित्व हाम्रो पार्टीमा आउनुले बुद्धभूमिमा परिवर्तनको लहर सुरु भएको सङ्केत गर्छ," सभापति भट्टराईले भन्नुभयो।

पछिल्लो समय पुराना राजनीतिक दलहरूबाट युवा र बौद्धिक वर्ग रास्वपाप्रति आकर्षित हुने क्रम बढ्दो छ। पन्थीको प्रवेशसँगै बुद्धभूमिको राजनीतिक समीकरणमा समेत फेरबदल आउन सक्ने अनुमान गरिएको छ।