कपिलवस्तु–२ मा कांग्रेसको क्षेत्रीय प्रचार–प्रसार समिति गठन

 फागुन २१ गते हुने प्रतिनिधि सभा निर्वाचनलाई लक्षित गर्दै नेपाली कांग्रेस कपिलवस्तु निर्वाचन क्षेत्र नम्बर २ मा क्षेत्रीय प्रचार–प्रसार समिति गठन गरिएको छ । तौलिहवास्थित पार्टी कार्यालयमा सम्पन्न जिल्ला भेलाले क्षेत्रीय सभापति केशवकुमार श्रेष्ठको नेतृत्वमा समिति गठन गर्ने निर्णय गरेको हो ।

भेलाले कांग्रेसका आधिकारिक उम्मेदवार सुरेन्द्रराज आचार्यलाई विजयी गराउन सबै तहका नेता–कार्यकर्तालाई परिचालन गर्ने निर्णय गरेको छ । सो अवसरमा सभापति श्रेष्ठले केही नयाँ दलहरूले मधेसको भावनालाई प्रयोग गरी भ्रम फैलाउन खोजे पनि कांग्रेस सधैं मधेसको हित र अधिकारका पक्षमा उभिएको बताए । उनले मधेसी समुदायबाटै रामवरण यादव राष्ट्रपतिमा निर्वाचित भएको उदाहरण प्रस्तुत गरे ।

श्रेष्ठले चर्चाका आधारमा मात्र नेतृत्व सम्भव नहुने उल्लेख गर्दै अनुभवी र परिपक्व नेतृत्व आवश्यक रहेको बताए । पार्टी सभापति गगन थापालाई भावी प्रधानमन्त्रीका रूपमा अघि सारिएपछि कांग्रेसप्रति देशभर सकारात्मक माहोल बनेको दाबी गर्दै उनले लोकतन्त्र, सुशासन र विकासका लागि कांग्रेसलाई मतदान गर्न अपिल गरे ।

कार्यक्रममा जिल्ला सभापति अब्दुल कलाम, नगर सभापति खुर्सेद अहमद खाँलगायत नेताहरूले पार्टीलाई एकताबद्ध बनाएर निर्वाचनमा सक्रिय भूमिका खेल्नुपर्नेमा जोड दिएका थिए ।