नर्थ प्वाइन्ट एकेडेमीमा नतिजा प्रकाशन तथा सम्मान कार्यक्रम सम्पन्न

 पत्थरकोटस्थित नर्थ प्वाइन्ट एकेडेमीले विद्यालयको वार्षिक नतिजा प्रकाशन तथा सम्मान कार्यक्रम भव्य रूपमा सम्पन्न गरेको छ।

कार्यक्रमका अध्यक्ष विद्यालय व्यवस्थापन समितिका अध्यक्ष गिरीराज बस्नेत रहनु भएको थियो भने प्रमुख अतिथि प्याप्सनका पूर्व केन्द्रीय सदस्य शिव गैरे हुनुहुन्थ्यो। विशिष्ट अतिथिका रूपमा वडा सदस्य मिना नेपालीको उपस्थिति रहेको थियो।

 साथै, कार्यक्रममा पुर्व अध्यक्षहरु, पुर्व प्रअ हरु विभिन्न समाजसेवी तथा अभिभावकहरूको पनि उल्लेखनीय उपस्थिति थियो।

 कार्यक्रमलाई सम्बोधन गर्दै प्रमुख अतिथि शिव गैरेले विद्यार्थीहरूलाई गुणस्तरीय शिक्षासँगै नैतिकता र अनुशासनमा पनि उत्तिकै ध्यान दिनुपर्ने धारणा राख्नुभयो। उहाँले भन्नुभयो, “विद्यालय शिक्षाको मन्दिर हो, यहाँबाट निस्कने विद्यार्थीहरू भविष्यका सक्षम नागरिक हुन्। यस्तो कार्यक्रमले विद्यार्थी, अभिभावक र शिक्षकबीचको सम्बन्ध झनै बलियो बनाउँछ।”

 कार्यक्रममा उत्कृष्ट शैक्षिक प्रदर्शन गर्ने विद्यार्थीहरूलाई प्रमाणपत्र तथा पुरस्कारद्वारा सम्मान गरिएको थियो। त्यस्तै, विद्यालयसँग सहकार्य गर्दै आएका अभिभावकहरूलार्इ पनि सम्मान गरिएको थियो। कार्यक्रमलाई अझ मनोरञ्जनात्मक बनाउन विभिन्न सांस्कृतिक प्रस्तुति—नृत्य, गीत तथा नाटकहरू प्रस्तुत गरिएका थिए ।

कार्यक्रमका प्रमुख आयोजक तथा विद्यालयका प्राचार्य हरि बेल्बासेले स्वागत मन्तब्य राख्दै विद्यालयको प्रगति, भावी योजना र सबैको सहकार्यप्रति आभार प्रकट गर्नुभएको थियो ।