सिड्नीमा कारको ठक्करबाट तीन वर्षीया बालिकाको मृत्यु, २७ वर्षीय सन्दीपविरुद्ध मुद्दा

३१ भदौ, काठमाडौं । पश्चिमी सिड्नीको अर्बनमा कारको ठक्करबाट तीन वर्षीया बालिकाको मृत्यु भएको घटनामा २७ वर्षीय सन्दीप अधिकारीविरुद्ध मुद्दा दायर भएको छ । लापरवाहीपूर्वक सवारी चलाएर मृत्यु निम्त्याएको आरोपमा पक्राउ परेका अधिकारी घटनाको २४ घण्टाभन्दा कम समयपछि बर्वुड स्थानीय अदालतमा उपस्थित भएका थिए । उनले आरोप स्वीकार वा अस्वीकारबारे अदालतमा हालसम्म कुनै प्रतिक्रिया दिएका छैनन् । अदालतबाट बाहिरिने क्रममा सञ्चारकर्मीले प्रश्न गर्दा अधिकारीले कागजको पानाले अनुहार छोप्ने प्रयास गरेका थिए । उनीसँग केही समर्थकसमेत देखिएका थिए । अधिकारीका वकिल ड्यानी इडले घटनालाई अत्यन्तै दुःखद बताएका छन् । उनका अनुसार अधिकारी निकै तनावमा छन् र पीडित परिवार तथा उनीहरूको अवस्थाबारे चिन्तित छन् ।