बैतडीमा पहिरोले एक घर पूर्णरूपमा पुरियो, थप क्षतिको विवरण संकलन जारी

३० भदौ, काठमाडौं । बैतडीको पुर्चौडी नगरपालिका–८ लामुनी गाउँमा पहिरोले गणेशदत्त जोशीको घर पूर्णरूपमा क्षतिग्रस्त भएको छ। सोमबार राति करिब ९ बजे घरमाथिबाट खसेको पहिरोले घर पुरेको हो।

जिल्ला प्रहरी कार्यालय बैतडीका प्रवक्ता प्रहरी निरीक्षक भुवनप्रसाद तिमिल्सेनाका अनुसार पहिरो खस्न थालेपछि परिवारले समयमै घर छाडेकाले मानवीय क्षति हुन पाएन। घर पूर्णरूपमा क्षतिग्रस्त भएपछि जोशी परिवार आफन्तको घरमा आश्रय लिएर बसेको छ।

पहिरोले गोठमा पुरिएका १० वटा बाख्रालाई प्रहरी, सशस्त्र प्रहरी र स्थानीयवासीको सहयोगमा जीवितै उद्धार गरिएको छ। पहिरोका कारण गाउँ नै उच्च जोखिममा परेको प्रहरीले जनाएको छ। स्थानीय १० परिवारका घरसमेत जोखिममा रहेकाले प्रहरीले उनीहरूलाई सुरक्षित स्थानमा सर्न आग्रह गरेको छ।