हुथी आक्रमण बढेपछि साउदीले पाकिस्तान–टर्कीसँग मक्का सुरक्षा सम्झौता सक्रिय गर्‍यो

हुथी विद्रोहीको बढ्दो आक्रमणपछि साउदी अरबले पाकिस्तान र टर्कीसँगको ऐतिहासिक ‘मक्का सुरक्षा सम्झौता’ सक्रिय बनाएको छ। सम्झौताअनुसार साउदी भूभाग र मक्का–मदिनाजस्ता पवित्र स्थलको सुरक्षाका लागि पाकिस्तानले सैनिक परिचालन गर्ने सहमति जनाएको छ। यमनमा सन् २०१४ देखि जारी गृहयुद्धका क्रममा हुथीहरूले राजधानी साना कब्जा गरेका थिए। गजा युद्धपछि लाल सागर, बाब अल–मन्देब र स्वेज नहर हुँदै जाने व्यापारिक जहाजमाथि उनीहरूको आक्रमण बढ्दा विश्वव्यापी आपूर्ति प्रभावित भएको छ। साउदीसँग पाकिस्तानको पुरानो सैन्य तथा रणनीतिक सम्बन्ध भए पनि यमन द्वन्द्वमा प्रत्यक्ष संलग्नता उसका लागि चुनौतीपूर्ण बनेको छ। भारतसँगको सीमा तनाव, अफगानिस्तानसँगको द्वन्द्व र आन्तरिक आतंकवादबीच थप सैन्य जिम्मेवारीले दबाब बढाउने देखिन्छ। इरानसँगको सम्बन्ध र सम्भावित साम्प्रदायिक तनावले पाकिस्तानको निर्णयलाई अझ संवेदनशील बनाएको छ।