कोशीका स्टार्टअप उद्यमी छनोट भए, तर बिउ पूँजी पाउन सकेनन्

२ असोज,  काठमाडौँ । नयाँ उद्यमीलाई प्रोत्साहन गर्ने उद्देश्यले कोशी प्रदेश सरकारले गत आर्थिक वर्षमा सञ्चालन गरेको ‘स्टार्टअप उद्यम बिउ पूँजी परिचालन कार्यक्रम’ अन्तर्गत छनोट भएका ३२ उद्यमीले बिउ पूँजी पाउन सकेनन् । प्रदेश सरकारले उद्यमशीलता विकास र नयाँ व्यवसायलाई प्रवर्द्धन गर्ने लक्ष्यसहित कार्यक्रम ल्याएको थियो । कार्यक्रमका लागि आवेदन दिएका उद्यमीमध्ये विभिन्न चरणको मूल्यांकनपछि ३२ जना छनोट भएका थिए । तर, सरकारले तयार पारेको कार्यविधिमा रहेको कानुनी तथा प्रक्रियागत त्रुटिका कारण छनोट भएका उद्यमीलाई स्वीकृत बिउ पूँजी उपलब्ध गराउन नसकिएको जनाइएको छ । कार्यक्रममार्फत व्यवसाय विस्तार तथा नयाँ उद्यम सञ्चालनका लागि आर्थिक सहयोग पाउने अपेक्षामा रहेका उद्यमीहरू सरकारी निर्णय र प्रक्रियागत समस्याका कारण निराश बनेका छन् ।