महाकालीमा बेपत्ता सशस्त्र प्रहरी जवानसहित दुई जनाको शव फेला

महाकाली नदीमा बेपत्ता भएका सशस्त्र प्रहरी जवानसहित दुई जनाको शव तीन दिनपछि फेला परेको छ। परशुराम नगरपालिका–५ परिगाउँस्थित महाकाली नदीमा हराएका सशस्त्र प्रहरी बलको बिओपी परिगाउँमा कार्यरत जवान ओमप्रकाश पुन मगर र स्थानीय ५६ वर्षीय तीर्थबहादुर थापा मगरको शव भेटिएको प्रहरीले जनाएको छ। तीर्थबहादुरको शव परिगाउँस्थित कल्पठ्ठेथान नजिक नदी किनारमा फेला परेको हो भने जवान पुनको शव कञ्चनपुरको ब्रह्मदेव पारी भारतको टनकपुर क्षेत्रस्थित नदी किनारमा भेटिएको हो। गत शुक्रबारदेखि सम्पर्कविहीन भएपछि खोजी तीव्र पारिएको थियो। शव परीक्षणको तयारी भइरहेको र घटनाबारे थप अनुसन्धान जारी रहेको प्रहरीले जनाएको छ।