काठमाडौँको गेस्ट हाउसबाट ब्राउन सुगरसहित दुई जना पक्राउ परेका छन्।

काठमाडौँको कोटेश्वर (महानगरपालिका-३२) स्थित विश्राम गेस्ट हाउसबाट १ सय २० ग्राम अवैध लागुऔषध ब्राउन सुगरसहित दुई जना पक्राउ परेका छन्। पक्राउ पर्नेमा पाँचथरको फालेलुङ-५ का ४२ वर्षीय सुन्दर राई र ४२ वर्षीया रविना राई रहेका छन्।

सशस्त्र प्रहरीका डीएसपी शैलेन्द्र थापाका अनुसार गए राति गेस्ट हाउसको कोठाबाटै ब्राउन सुगर बिक्रीवितरण गरिरहेको अवस्थामा सशस्त्र प्रहरीको टोलीले उनीहरूलाई नियन्त्रणमा लिएको हो।

बिक्रीका लागि राखिएको ठूलो मात्राको ब्राउन सुगरसहित पक्राउ परेका दुवै जनामाथि थप अनुसन्धान तथा कानुनी कारबाही अगाडि बढाइएको प्रहरीले जनाएको छ।