तनहुँमा १२६ मेगावाटको तल्लो सेती जलविद्युत् आयोजना निर्माण हुने

तनहुँ जिल्लामा १२६ मेगावाट क्षमताको तल्लो सेती जलविद्युत् आयोजना निर्माण हुने भएको छ। सेती नदीमा निर्माण हुने अर्ध–जलाशययुक्त आयोजनाका लागि एसियाली विकास बैंकको २२७ मिलियन अमेरिकी डलर लगानी रहने आयोजना प्रमुख हरिकुमार श्रेष्ठले जानकारी दिनुभयो। आयोजना ३० प्रतिशत स्वपुँजी र ७० प्रतिशत ऋणमा निर्माण हुनेछ। बाँध बन्दीपुर–६ र देवघाट–३ मा रहनेछ भने विद्युत्गृह, सुरुङ तथा कर्मचारी आवास देवघाट–३ र ४ मा निर्माण गरिनेछ। आयोजनाका लागि १४६ रोपनी जग्गा अधिग्रहण प्रक्रिया सुरु गरिएको छ। वार्षिक ५२० मिलियन युनिट विद्युत् उत्पादन हुने अनुमान गरिएको आयोजनाले ऊर्जा आपूर्ति सुदृढ बनाउँदै स्थानीय रोजगारीसमेत सिर्जना गर्ने अपेक्षा गरिएको छ। यस आयोजनाबाट गण्डकी प्रदेशमा औद्योगिक विकास, आर्थिक गतिविधि विस्तार र विद्युत् पहुँचमा सुधार हुनेछ।