पर्वतमा सुक्खा पहिरोले घर पुरिँदा एक जना घाइते भएका छन्

पर्वतको जलजला गाउँपालिका–७ लामाबगरमा आज बिहान साढे ५ बजे सुक्खा पहिरो जाँदा ६५ वर्षीय आत्माराम आचार्य घाइते भएका छन्।

ढुङ्गा–माटोसहित खसेको पहिरोले घर पुरिँदा उनी भित्रै च्यापिएका थिए। स्थानीय र प्रहरीको टोलीले उद्धार गरी उपचारका लागि म्याग्दीस्थित बेनी अस्पताल पठाएको छ।

प्रहरीका अनुसार पहिरोमा परी उनको टाउको र आँखाको माथिल्लो भागमा चोट लागेको छ भने स्वास्थ्य अवस्था मध्यम रहेको छ। वर्षा बिना नै एक्कासि खसेको सुक्खा पहिरोले घरमा पूर्ण रूपमा क्षति पुर्याएको छ।