कञ्चनपुरबाट १५ ग्रामभन्दा बढी खैरो हेरोइनसहित दुई जना पक्राउ परे।

कञ्चनपुरको भीमदत्त नगरपालिका–१० स्थित गौरीशंकर मन्दिर परिसरबाट प्रहरीले १५.६७ ग्राम खैरो हेरोइनसहित दुई जनालाई पक्राउ गरेको छ। गोप्य सूचनाका आधारमा खटिएको टोलीले कृष्णपुर–२ का ३१ वर्षीय हेमराज जोशी र भीमदत्त–६ का ४२ वर्षीय महेशप्रसाद भट्टलाई नियन्त्रणमा लिएको हो। प्रहरी निरीक्षक वीरेन्द्र थापाका अनुसार सोमबार साँझ पक्राउ परेका उनीहरूको साथबाट लागूपदार्थका साथै उनीहरूले प्रयोग गरेको सुपप्र०१ ००८प ६३४३ नम्बरको मोटरसाइकल र दुई थान मोबाइलसमेत बरामद गरिएको छ। अवैध लागूपदार्थ कारोबारमा संलग्न रहेको अभियोगमा पक्राउ परेका दुवै जनालाई थप अनुसन्धान तथा कानुनी कारबाहीका लागि जिल्ला प्रहरी कार्यालय कञ्चनपुरको हिरासतमा राखिएको छ।