सल्यानमा फैलियो स्क्रब टाइफस, सोमबार एकै दिन ५६ संक्रमित थपिए

सल्यान। सल्यानमा साउनदेखि फैलिएको स्क्रब टाइफस नियन्त्रणमा नआउँदा दार्मा र छत्रेश्वरीमा ९ जनाको मृत्यु भएको छ। विशेषज्ञसहितको टोलीले उपचार र अनुसन्धान जारी राखे पनि जनस्वास्थ्य सचेतनाको अभाव र सावधानी नअपनाउँदा संक्रमण फैलिरहेको छ। सोमबार मात्रै थप ५६ जनामा संक्रमण पुष्टि भएको छ।

२,५०० जनामा परीक्षण गर्दा जिल्लाभर हालसम्म ६०६ जना संक्रमित भेटिएका छन्। किर्नाले टोक्ने यो रोगबारे टेकुस्थित रोग नियन्त्रण महाशाखाको टोलीले समेत अध्ययन गरिरहेको छ। बिरामीहरू समयमै स्वास्थ्य संस्था नगई मेडिकलका कडा औषधि प्रयोग गर्दा जोखिम बढेको हो। हाल स्वास्थ्य सेवा कार्यालय र पालिकाहरूले खोजपडताल, निःशुल्क शिविर, उपचार र सचेतना अभियानलाई थप तीव्र बनाएका छन्।