शिक्षकको क्षमता विकासमा आदर्श इङ्लिस बोडिङ स्कुलको तालिम

आदर्श इङ्लिस बोडिङ स्कुलद्वारा आयोजित शिक्षकहरूको पेशागत क्षमता विकास तालिम कार्यक्रम  होटल पौवामा सम्पन्न भएको छ। कार्यक्रमको अध्यक्षता विद्यालयका प्रिन्सिपल गोविन्द खनाल ले गर्नुभएको थियो भने प्रमुख अतिथिका रूपमा बुद्धभूमि नगरपालिका–४ का वडा अध्यक्ष सुशिल कुमार चौधरी सहभागी हुनुभएको थियो।

कार्यक्रममा विशिष्ट अतिथि तथा प्रशिक्षक डी. आर. दाहाल ले बालमैत्री शिक्षा विधि, प्रभावकारी अध्यापन शैली, विद्यालयको संस्कार, खेल्दै पढ्दै सिकाइ प्रक्रिया तथा व्यवहारिक शिक्षालगायत विषयमा प्रशिक्षण दिनुभएको थियो। उहाँले समयअनुसार शिक्षण पद्धतिमा परिवर्तन आवश्यक रहेको उल्लेख गर्दै विद्यार्थी केन्द्रित शिक्षाले मात्रै गुणस्तरीय सिकाइ सम्भव हुने बताउनुभयो।

प्रमुख अतिथि सुशिल कुमार चौधरीले शिक्षकको क्षमता विकास बिना गुणस्तरीय शिक्षा सम्भव नहुने बताउँदै यस्ता तालिमले विद्यालयको शैक्षिक वातावरण सुधार गर्न महत्वपूर्ण भूमिका खेल्ने धारणा राख्नुभयो। उहाँले शिक्षासँगै संस्कार र व्यवहारिक ज्ञानलाई जोड्नुपर्ने आवश्यकता औंल्याउनुभयो।

विद्यालयका प्रवन्ध निर्देशक कृष्ण प्रसाद भट्टराई ले सञ्चालन गर्नुभएको कार्यक्रममा शिक्षक विरेन्द्र यादव ले स्वागत मन्तव्य व्यक्त गर्नुभएको थियो।

तालिमपछि सहभागी शिक्षक–शिक्षिकाहरूले कार्यक्रमबाट नयाँ ज्ञान र शिक्षण सीप सिक्ने अवसर प्राप्त भएको प्रतिक्रिया दिएका छन्। उनीहरूले सिकेका विधि आगामी दिनमा कक्षाकोठामा प्रयोग गर्ने प्रतिबद्धता समेत व्यक्त गरेका छन्।