जेनजी विद्रोहका दुई दिनमै सडक आन्दोलनले यसरी गर्‍यो सत्ता परिवर्तन

शासकीय अव्यवस्था, भ्रष्टाचार र सामाजिक सञ्जाल बन्दविरुद्ध जेनजी युवाले गरेको दुईदिने विद्रोह नेपालको राजनीतिक इतिहासमै अभूतपूर्व बन्यो। वर्षौंदेखि शासनमा रहेका दल र नेताहरूलाई एकैपटक सत्ताबाट हटाउने आन्दोलनले नेतातन्त्रविरुद्ध व्यापक जनआक्रोश देखायो। आन्दोलनका क्रममा सुरक्षाकर्मी र प्रदर्शनबीचको हिंसात्मक झडपमा ७६ जना निहत्था नागरिकको ज्यान गयो भने सयौं घाइते भए। कार्यपालिका, व्यवस्थापिका, न्यायपालिका तथा राष्ट्रपति कार्यालयका मुख्य भवनमा आगजनी र तोडफोड भयो। प्रहरी चौकीमा आगो लगाइयो, हतियार र बर्दी खोसिए तथा नेताहरूका घरमा पनि आक्रमण भयो। गोली प्रहार, जलेका एम्बुलेन्स र उद्धारमा देखिएको अवरोधले केही समय राज्यविहीनताजस्तो भयावह अवस्था सिर्जना भयो। इतिहासमा विरलै देखिएको यस घटनाका महत्वपूर्ण दृश्यहरू क्यामेरामा कैद भएका छन्। यो आन्दोलनले देशको राजनीतिक शक्ति सन्तुलन नै बदलिदियो।