वैशाख २६ मा होटल तथा रेस्टुरेन्ट व्यवसायी संघको अधिवेशन हुने

कपिलवस्तु, — होटल तथा रेस्टुरेन्ट व्यवसायी संघ जिल्ला कार्य समिति कपिलवस्तुले यही वैशाख २६ गते चौथो अधिवेशन तथा सातौं साधारण सभा आयोजना गर्ने भएको छ। संघले जारी गरेको सूचनाअनुसार उक्त कार्यक्रम बुद्धभुमि नगरपालिका २ बडहरामा रहेको लुम्बिनी ढावामा हुने जनाइएको छ।

संघले सम्पूर्ण सदस्य व्यवसायीहरूलाई अनिवार्य उपस्थितिका लागि आग्रह गरेको छ। अधिवेशनमार्फत संगठनको वर्तमान गतिविधिको समीक्षा, भावी योजना निर्माण तथा नयाँ नेतृत्व चयनलगायत महत्वपूर्ण निर्णयहरू गरिने अपेक्षा गरिएको छ।

यसैबीच, संघले सबै होटल तथा रेस्टुरेन्ट व्यवसायीहरूलाई आफ्नो व्यवसाय दर्ता तथा नविकरण कार्य समयमै गर्न विशेष आग्रह समेत गरेको छ। व्यवसाय दर्ता र नविकरण समयमै नगर्दा कानुनी जटिलता आउन सक्ने भन्दै संघले जिम्मेवार बन्न सबैलाई अनुरोध गरेको हो।

संघका महासचिव पदम ढकाल र कोषाध्यक्ष लक्षमण न्यौपानेका अनुसार व्यवसायलाई व्यवस्थित, पारदर्शी र दिगो बनाउन समयमै नविकरण गर्नु आवश्यक रहेकोले सम्बन्धित निकायसँग समन्वय गरी प्रक्रिया पूरा गर्न आग्रह गरिएको छ।

अधिवेशनलाई सफल बनाउन सबै सदस्य तथा सरोकारवालाहरूको सक्रिय सहभागिता आवश्यक रहेको संघले जनाएको छ।