बुद्धभुमि नगरपालिकाका कर्मचारीको आन्दोलनको कारण सेवाग्राहि मर्कामा

जिल्लाको बुद्धभुमि नगरपालिकामा कार्यरत कर्मचारीहरूले विभिन्न माग राखी सुरु गरेको आन्दोलनले सेवाग्राहि मारमा परेका छन्। देशभरका स्थानियतहमा कार्यरत कर्मचारी हरुले सङ्घीय निजामती सेवा ऐनको सट्टा एकीकृत निजामती सेवा ऐन जारी गर्नुपर्ने, प्रमुख प्रशासकीय अधिकृत स्थानीय तहकै कर्मचारी हुनुपर्ने, अन्तरस्थानीय तहका कर्मचारीको सरुवामा दोहोरो सहमति आवश्यक नपर्ने लगायतका माग राखी उनीहरू आन्दोलन गरिरहेका छन्।

स्थानीय तह कर्मचारी संघर्ष समिति बनाएर आन्दोलनमा उत्रिएका उनीहरूले सङ्घीय निजामती ऐनमा स्थानीय तहका कर्मचारीलाई विभेद गरिएको आरोप लगाएका छन् । स्थानीय तहका कर्मचारीलाई निजामतीको परिभाषाभित्र समेट्नुपर्ने, संघ, प्रदेश र स्थानीय तहका कर्मचारीहरूलाई कुनै पनि सेवामा प्रवेश गर्दा उमेर हद नलगाउनुपर्ने, अन्तरप्रदेश सरुवाको व्यवस्था ऐनमै राखिनुपर्ने लगायतका माग छन्।

गत शुक्रवार देखि पेनडाउन गरेर आन्दोलनमा उत्रिएका बुद्धभुमि नगरपालिकाका कर्मचारीको आन्दलनका कारण सेवाग्राहीहरु मर्कामा परेका छन् ।  घर नक्सा सम्बन्धी काम गर्न नगरपालिका आएका बुद्धभुमि २ गोरुसिङेका नारायण पौडेलले कर्मचारीको आन्दलनका कारण काम हुन नसकेको बताए । अन्य सेवाग्राही पनि कर्मचारीको पेनडउनको मारमा परेका छन् ।